សៀមរាប៖ អាជ្ញាធរជាតិអប្សរាបានប្រកាសបើកដំណើរការឡើងវិញនូវការទស្សនាថ្ងៃលិចនៅប្រាសាទប្រែរូបនៃរមណីយដ្ឋានអង្គរ ដែលជាតំបន់ទេសចរណ៍វប្បធម៌ និងទេសចរណ៍ដ៏សំខាន់។
ការបើកដំណើរការឡើងវិញនេះ បន្ទាប់ពីការជួសជុលរួចរាល់នូវទីតាំងដែលមានហានិភ័យរបស់ប្រាសាទប្រែរូប ដោយធានាបាននូវសុវត្ថិភាពសម្រាប់ភ្ញៀវទេសចរទាំងអស់។
អាជ្ញាធរជាតិអប្សរាបានជូនដំណឹងដល់ក្រសួង ស្ថាប័នជាតិ អន្តរជាតិ អាជ្ញាធរដែនដី មន្ទីរ-អង្គភាព សមាគមទីភ្នាក់ងារទេសចរណ៍ សមាគមមគ្គុទ្ទេសក៍ទេសចរណ៍ សមាគមដឹកជញ្ជូនភ្ញៀវទេសចរ ក្រុមហ៊ុនទេសចរណ៍ ភ្ញៀវទេសចរជាតិ-អន្តរជាតិ សាធារណជន ដើម្បីបន្ថែមបទពិសោធន៍ថ្មីជូនភ្ញៀវទេសចរជាតិ និងអន្តរជាតិ អាជ្ញាធរជាតិអប្សរា នឹងបើកឡើងវិញការទស្សនាថ្ងៃលិចនៅប្រាសាទប្រែរូប នៃរមណីយដ្ឋានអង្គរ ចាប់ពីថ្ងៃជូនដំណឹងនេះតទៅ។
អាជ្ញាធរជាតិអប្សរា បានអំពាវនាវចំពោះភ្ញៀវជាតិ និងអន្តរជាតិ មកទស្សនាកន្លែងកែលម្អ និងសុវត្ថិភាពនៅប្រាសាទប្រែរូប ខណៈកិច្ចខិតខំប្រឹងប្រែងនេះគឺជាផ្នែកមួយនៃគំនិតផ្តួចផ្តើមដែលកំពុងបន្តក្នុងការកែលម្អបទពិសោធន៍អ្នកទស្សនានៅតំបន់ប្រវត្តិសាស្ត្រដ៏សំខាន់របស់កម្ពុជា ទន្ទឹមនឹងការអភិរក្សបេតិកភណ្ឌវប្បធម៌របស់ខ្លួនសម្រាប់មនុស្សជំនាន់ក្រោយ៕
